Drejtori i Përgjithshëm i Policisë së Shtetit, Drejtues Madhor Ilir Proda, ka vlerësuar publikisht me Certifikatën për Shërbime të Dalluara inspektorin Klajdi Mustaj. Vlerësimi vjen pas një akti heroik të Mustajt, i cili me guxim dhe profesionalizëm arriti të shpëtonte tre qytetarë që kishin mbetur të bllokuar në një makinë pas një aksidenti të rëndë në aksin rrugor Levan-Fier.
Ngjarja tragjike ndodhi mbrëmjen e së premtes në Qafën e Koshovicës, ku një automjet tip “Benz” doli nga rruga dhe u përmbys. Në mjet ndodheshin katër persona, tre prej të cilëve mbetën të plagosur. Ndërhyrja e shpejtë e inspektor Klajdi Mustajt ishte vendimtare, pasi ai arriti t’i nxirrte të plagosurit nga makina, duke shmangur një tragjedi edhe më të madhe.
“Një shembull frymëzues për të gjithë trupën policore”
Në mesazhin e tij, Drejtori Proda theksoi se veprimi i inspektor Mustajt tregon më së miri misionin e Policisë së Shtetit. “Guximi, profesionalizmi dhe reagimi i shpejtë i punonjësit tonë në shpëtimin e tre bashkëqytetarëve është shembull frymëzues për të gjithë trupën policore. I shpreh mirënjohjen time dhe të gjithë Policisë së Shtetit për këtë akt human e profesional. Faleminderit për guximin dhe zemrën e madhe që tregove në shërbim të qytetarëve,” u shpreh Proda.
Ai theksoi se virtyte si angazhimi, përkushtimi, profesionalizmi, sakrifica, ndershmëria dhe humanizmi duhet të jenë motoja e çdo efektivi policor, duke përfaqësuar fytyrën e re të Policisë së Shtetit. Klajdi Mustaj, i cili është pjesë e Policisë së Shtetit prej shkurtit 2024, ka përfunduar studimet për Shkencat Juridike dhe aktualisht po ndjek studimet “Master”, duke treguar një angazhim të vazhdueshëm për t’u specializuar në detyrën e tij.