Bota e futbollit është në zi pas lajmit të hidhur për vdekjen e Frank Mill, ish-sulmuesit të kombëtares së Gjermanisë Perëndimore, i cili ndërroi jetë sot në moshën 67-vjeçare.
Lajmi u bë i ditur nga gazeta gjermane “Bild”, e cila raportoi se Mill nuk arriti të shërohej pas një goditjeje në tru që kishte pësuar në maj, gjatë një udhëtimi në Itali.
Një karrierë e shkëlqyer në futboll
Frank Mill shquhej si një nga sulmuesit më të talentuar të kohës së tij. Ai e nisi karrierën në klubin e qytetit të tij të lindjes, Rot-Weiss Essen, ku shënoi 41 gola në një sezon. Më pas, karriera e tij u zhvillua në klube të njohura si Borussia Mönchengladbach dhe Borussia Dortmund. Me këtë të fundit, Mill arriti të fitojë Kupën e Gjermanisë në vitin 1989.
Në total, ai shënoi 123 gola në 387 ndeshje të Bundesligës.
Arritjet me kombëtaren
Mill ishte pjesë e skuadrës legjendare të Gjermanisë Perëndimore që fitoi Kupën e Botës në vitin 1990. Gjithashtu, ai ishte pjesë e ekipit që fitoi medaljen e bronztë në Lojërat Olimpike të vitit 1988.
Vdekja e tij ka prekur thellë komunitetin e futbollit. Alexander Rang, anëtar i bordit të klubit të Essen, e përshkroi Mill si një njeri të shkëlqyer, të thjeshtë dhe plot energji pozitive, duke theksuar se ai ishte një ambasador për futbollin në mbarë Gjermaninë.
