Një ngjarje e rëndë dhe shqetësuese ka ndodhur pasditen e djeshme pranë Spitalit Hygeia, në rrugën dytësore që të çon drejt QTU-së. Një i ri, i cili po lëvizte në kundërvajtje, ka shkaktuar kaos në trafik dhe ka terrorizuar qytetarët me sjellje agresive dhe kërcënime me armë.
Pamjet e siguruara nga qytetarët dëshmitarë tregojnë të riun duke dalë nga makina e tij me targa AB 519 NP. Ai u ka bërtitur me zë të lartë drejtuesve të tjerë të automjeteve: “Jam i çmendur, hape rrugën!” dhe në një moment ka nxjerrë një pistoletë nga brezi, duke shkaktuar panik të madh.
Sipas dëshmisë së një qytetari, ky incident ishte një shfaqje e paprecedentë force dhe papërgjegjshmërie. “Si ka mundësi ka akoma këto lloj njerëzish në rrugë?” pyet ai, duke theksuar se kërcënimi me armë në mes të ditës dhe trafikut është kthyer në një realitet të frikshëm.
Thirrje për veprim nga institucionet
Ngjarja ka ngritur shqetësime të mëdha për sigurinë në rrugët e Tiranës. Dëshmitarët shprehen të zhgënjyer nga heshtja e institucioneve dhe theksojnë se sjellje të tilla të paligjshme dhe të rrezikshme duket se mbeten të pandëshkuara. Ata argumentojnë se një person që kërcënon qytetarët me armë dhe shprehet se është “i çmendur”, përbën një rrezik të drejtpërdrejtë për shoqërinë.
Targat e makinës janë të dukshme në video dhe shumë shpresojnë që ky individ të identifikohet dhe të ndalohet sa më shpejt nga Policia e Shtetit, në mënyrë që të mos bëhet shkak për ngjarje të tjera më të rënda. Ky incident shërben si një sinjal alarmi për autoritetet për të forcuar kontrollet dhe për të garantuar sigurinë e qytetarëve, të cilët ndjehen gjithnjë e më të pasigurt në rrugë.