Një tërmet i jashtëzakonshëm me magnitudë 8.8 ballë, më i fuqishmi i regjistruar në këtë rajon në gati 73 vjet, ka goditur orët e para të mëngjesit zonën detare pranë gadishullit rus Kamchatka. Ky tërmet ka shkaktuar menjëherë cunami, duke ngritur alarme emergjente dhe duke nxitur evakuime masive në disa vende përgjatë Oqeanit Paqësor, përfshirë Rusinë, Japoninë dhe Shtetet e Bashkuara.
Sipas Ministrisë ruse për Menaxhimin e Emergjencave, qyteti Severo-Kurilsk, në Ishujt Kurile, është përmbytur nga uji. Pamjet e shpërndara në rrjetet sociale treguan ujë të furishëm që pushtonte rrugët dhe depërtonte në ndërtesa, duke detyruar evakuimin urgjent të rreth 2,000 banorëve të qytetit.
Valë Cunami në Japoni dhe Evakuime në SHBA
Në Japoni, transmetimet televizive shfaqën banorë që largoheshin drejt zonave më të larta, veçanërisht në ishullin verior Hokkaido, ku u regjistrua një valë e parë cunami me lartësi rreth 30-60 cm. Më shumë se 1.9 milionë njerëz në të gjithë Japoninë janë urdhëruar të zhvendosen në vende të sigurta, ndërkohë që transporti në vend është ndërprerë. Megjithatë, mediat ndërkombëtare njoftojnë se valët e cunamit kanë mbetur shumë më të vogla se sa ishte parashikuar fillimisht.
Edhe në Shtetet e Bashkuara të Amerikës ka pasur evakuime. Guvernatori i Havait, Josh Green, u ka kërkuar banorëve të ndjekin urdhrat e evakuimit dhe të ruajnë qetësinë. Presidenti i SHBA-së, Donald Trump, këshilloi amerikanët të jenë në gatishmëri ndaj paralajmërimeve për cunami.
Detajet Sizmologjike dhe Historiku
Instituti Amerikan i Studimeve Gjeofizike bën të ditur se tërmeti u regjistrua në orën 01:35 sipas kohës lokale, në një thellësi prej 20.7 kilometrash, rreth 126 kilometra larg nga qyteti kryesor i rajonit të Kamchatkas, në skajin më lindor të Rusisë.
Fillimisht, tërmeti u raportua me magnitudë 8.0 ballë, më pas u përmirësua në 8.7 dhe përfundimisht u konfirmua në 8.8 ballë. Sipas Akademisë së Shkencave të Rusisë, ky është tërmeti më i fuqishëm i regjistruar në këtë zonë që prej vitit 1952, duke shënuar një ngjarje sizmike me përmasa të jashtëzakonshme për rajonin e Paqësorit.
🚨 BREAKING: CATASTROPHIC tsunami damage seen in the village of Severo-Kurilsk, Russia
This originated from the same earthquake sending tsunami waves to Hawaii
GET TO HIGHER GROUND, HAWAII! THIS COULD BE YOU! pic.twitter.com/njK8vhAsMS
— Nick Sortor (@nicksortor) July 30, 2025