Juventusi po përpiqet shumë për t’ia dhënë sa më shpejt Thiago Motta-s një mbrojtës si Ronald Araujo. Duke pasur parasysh vështirësitë për të arritur Hanckon dhe Antonio Silva (Benfica vazhdon të bllokojë, pavarësisht presionit të agjentit Mendes), emrat e parë në listën e Giuntolit, bardhezinjtë po bëjnë presion për qendërmbrojtësin e Barcelonës, i cili së fundi është rikthyer në dispozicion, pas një dëmtimi të gjatë.
Konfirmimi erdhi direkt nga agjenti i 25-vjeçarit uruguajan: “Kemi marrë disa oferta në janar, më e rëndësishmja është ajo e Juventusit. Për momentin nuk kemi marrë asnjë vendim, lojtari është në pritje të zgjedhjeve të Barcelonës”.
Prandaj, topi tani kalon te Blaugranët, të cilët duhet të bëjnë një zgjedhje. Araujo luajti vetëm 90 minuta në “Copa del Rey”, më 4 janar. Mendimin e tij do ta shprehë edhe trajneri Flick. Për momentin, katalanasit duket se duan ta shesin mbrojtësin, jo ta japin në formë huazimi.
Presidenti Laporta kërkon një transferim të përhershëm, apo huazim me detyrim blerje, por sigurisht jo për shifra afër 60-70 milionë euro. Kjo për shkak të ‘fajit’ të kontratës, që skadon më 30 qershor 2026, e cila nuk ka gjasa të zgjatet. Barcelona, këtë herë në qoshe të ‘ringut’, po shtyn të fitojë para nga mbrojtësi në fjalë.
Shiko edhe: Biseda e parë i Parashqevisë me djalin të dy shpërthejnë në lot