Sipas sinoptikanes së njohur Tanja Porja, vala e të nxehtit që ka përfshirë vendin pritet të vijojë me intensitet të lartë edhe gjatë dhjetë ditëve të fundit të muajit korrik.
Në një prononcim të fundit, Porja thekson se temperaturat do të qëndrojnë mbi mesataren sezonale dhe do të përshkallëzohen ndjeshëm sidomos në zonat e brendshme të vendit.
Sipas saj, kulmi i të nxehtit pritet të regjistrohet nga mesi i javës së ardhshme, ku në qarkun e Beratit temperaturat do të arrijnë nivele rekord prej deri në 44 gradë Celsius.
Ky nivel i lartë vlerësohet si ekstrem dhe mund të sjellë pasoja serioze për shëndetin publik dhe jetën e përditshme të qytetarëve.
Moti përvëlues nuk do të kufizohet vetëm në orët e ditës. Termometri do të mbetet i lartë edhe gjatë orëve të natës, duke e bërë të vështirë freskimin dhe pushimin,
veçanërisht për grupet më të rrezikuara si të moshuarit, fëmijët e vegjël dhe personat me sëmundje kronike. Kjo periudhë pritet të jetë një ndër më të vështirat e këtij viti sa i përket kushteve atmosferike.
Autoritetet shëndetësore dhe ato vendore rekomandojnë shmangien e ekspozimit të drejtpërdrejtë në diell në oraret e mesditës, konsumimin e lëngjeve në mënyrë të vazhdueshme dhe qëndrimin në ambiente të freskëta sa më shumë që të jetë e mundur.
Parashikimet ngrenë shqetësimin për një verë gjithnjë e më ekstreme, si pasojë e ndryshimeve klimatike globale.