Gazetarja Klodiana Lala, e ftuar në emisionin “Të Paekspozuarit” në MCN TV, ka hedhur dritë mbi një fenomen të errët dhe të përsëritur ndër vite në sistemin penitenciar shqiptar: vajza të njohura të ekranit dhe botës së showbiz-it që frekuentojnë burgjet për takime speciale me bosë të krimit të organizuar.
Sipas Lalas, ky nuk është një fenomen i ri apo i paparë më parë. Ai ka ekzistuar në mënyrë të heshtur në të kaluarën dhe vazhdon edhe sot, pavarësisht ndërrimit të qeverive apo reformave në sistemin e drejtësisë. Vajza të njohura publike, që shfaqen shpesh në televizion apo rrjete sociale si modele, moderatore apo këngëtare, kanë hyrë dhe dalë në mënyrë të rregullt nga ambientet e burgjeve me siguri të lartë, për të takuar individë të njohur të botës së krimit.
“Në burgun e sigurisë së lartë në Fushë-Krujë, një prej vajzave që dilte më shpesh në ekran, shkonte çdo javë për të takuar një prej bosëve më të mëdhenj të krimit,” – tha Lala. “Situata shkoi deri në atë pikë sa brenda burgut u ndërtua një palestër, për të mundësuar kushte të rehatshme për të dënuarin dhe partneren e tij.”
Lala theksoi se në dhjetëra raste, këto vajza janë futur në burgje duke përdorur kontrata fiktive, ku paraqiten si bashkëjetuese të kriminelëve të burgosur, ndonëse nuk kanë asnjë lidhje ligjore apo faktike me ta. Në shumë raste, sipas gazetares, këto vajza nuk janë nga Shqipëria, por vijnë edhe nga jashtë vendit, dhe përfitojnë nga boshllëqet ligjore për të hyrë në kontakt me figura të botës së krimit.
“Kjo nuk është vetëm përgjegjësi e policisë së burgjeve, është çështje sistemi,” – deklaroi ajo. “Kur një sistem të lejon të shpikësh një kontratë bashkëjetese për të takuar një bos droge apo krimi në qeli, kemi një problem të thellë institucional.”
Fenomeni u bë edhe më publik pas një kontrolli në sektorin ku qëndron Laert Haxhiu, një nga emrat më të përfolur të krimit të organizuar në Shqipëri. Gjatë këtij kontrolli, u sekuestruan tre telefona celularë, të cilët dyshohet se përdoreshin nga Haxhiu dhe bashkëpunëtorët e tij.
Pikërisht për shkak se në atë kohë Laert Haxhiu dyshohej nga SPAK se kishte planifikuar atentate ndaj dy prokuroreve, hetuesit morën celularët për t’i analizuar. Ajo çka zbuluan i çoi në një tjetër rrjedhë hetimi: komunikime të vazhdueshme me vajza të ekranit dhe modelingut, disa prej të cilave kishin hyrë më parë në ambientet e burgut.
“Në ato celularë u gjetën të dhëna dhe komunikime që implikonin vajza të botës së televizionit dhe modelingut,” – tha Lala, duke theksuar se kjo lidhje mes krimit të organizuar dhe figurave publike femërore ka mbetur e heshtur për një kohë të gjatë, për shkak të mungesës së vullnetit institucional për ta adresuar.
Deklaratat e Klodiana Lalas janë ndër më të drejtpërdrejtat që janë bërë deri tani në publik mbi këtë temë, dhe rikthejnë vëmendjen te lidhjet mes botës së spektaklit, burgjeve dhe strukturave kriminale, ku përfitimi dhe imuniteti social shpesh shkojnë përtej çdo kuadri ligjor apo moral.