Presidenti rus Vladimir Putin ka informuar homologun e tij amerikan, Donald Trump, se Rusia planifikon të intensifikojë operacionet ushtarake në Ukrainën lindore brenda 60 ditëve të ardhshme. Ky njoftim vjen në mes të rritjes së mbështetjes ushtarake perëndimore për Ukrainën.
Sipas raportimeve të Axios, të cilat citojnë burime të paidentifikuara të njohura me përmbajtjen e një telefonate të zhvilluar në fillim të këtij muaji midis dy liderëve, Moska ka për qëllim të marrë kontrollin e plotë të territoreve ukrainase që aktualisht janë të pushtuara.
Telefonata Trump-Putin u zhvillua më 3 korrik. Burimet theksojnë se Putin gjatë bisedës ka deklaruar se Rusia do të vazhdojë ofensivën e saj derisa të arrijë kontrollin e plotë territorial mbi rajonet e pushtuara të Ukrainës. Sipas Kyiv Independent, Trump i ka thënë Presidentit francez Emmanuel Macron pas bisedës me Putinin se udhëheqësi rus “dëshiron të marrë gjithçka”.
Ky njoftim vjen në një kohë kur Rusia po intensifikon sulmet në rajonin e Donetskut dhe po tenton të depërtojë nëpër linjat mbrojtëse ukrainase drejt rajonit të Dnipropetrovskut, i cili deri më tani ka qenë relativisht i kursyer nga ndërhyrje të mëdha ushtarake.
Aktualisht, Rusia kontrollon afërsisht 20% të territorit të Ukrainës, duke përfshirë pothuajse të gjithë Oblastin e Luhanskut, dy të tretat e Donetskut dhe pjesë të Oblasteve të Zaporizhias dhe Khersonit. Pas referendumeve të cilësuara si të rreme në vitin 2022, Rusia shpalli aneksimin e këtyre zonave, një veprim ky që nuk njihet ndërkombëtarisht.
Në një zhvillim tjetër të ndërlidhur, më 14 korrik, Presidenti Trump njoftoi se Shtetet e Bashkuara do të dërgojnë sisteme shtesë të mbrojtjes ajrore Patriot në Kiev. Kjo paketë e ndihmës ushtarake shënon të parën e këtij lloji nga administrata Trump për Ukrainën që nuk është trashëguar nga administrata e mëparshme Biden. Ky veprim mund të sinjalizojë një ndryshim në qëndrimin e Trumpit, i cili duket se po mbështet gjithnjë e më shumë aftësitë mbrojtëse të Ukrainës, krahas thirrjeve të mëparshme drejtuar Putinit për negociata.