Eksperti i kriminalistikës, Ervin Karamuço, ka komentuar rëndësinë e vizitave të shpeshta të diplomatëve amerikanë dhe të tjerë të huaj në Prokurorinë e Posaçme (SPAK) në Shqipëri. Gjatë një interviste në emisionin “Real Story” në ABC News, Karamuço u shpreh se këto vizita shpeshherë paraprijnë arrestime të rëndësishme.
“Vizitat e herë pas hershme të diplomatëve, gjithmonë pasohen nga një arrestim i madh. Na kanë ndodhur herë pas here, kur ka shkuar anglezi, amerikanët na kanë dalë përshtypjet. Është si një mesazh mbështetjeje,” – deklaroi Karamuço, duke nënkuptuar se prezenca e diplomatëve të huaj në SPAK shërben si një sinjal i fortë mbështetjeje ndërkombëtare për luftën kundër korrupsionit dhe krimit të organizuar në Shqipëri.
Karamuço gjithashtu u ndal në debatin aktual për drejtuesin e ri të Byrosë Kombëtare të Hetimit (BKH), duke theksuar kontributin e vazhdueshëm të Shteteve të Bashkuara në këtë proces. “Amerika ka dhënë kontribut, edhe në testimet e para, trajnimet që ka pasur. Sot ishte testi fizik, në repartin e RENEA-s, u zhvilluan që në mëngjes,” – tha ai, duke vënë në dukje se mbështetja amerikane për SPAK dhe BKH, ndonëse mund të jetë reduktuar në përgjithësi, nuk do të përfundojë.
Eksperti i kriminalistikës e interpretoi prezencën e diplomatëve si një mesazh të qartë se Shtetet e Bashkuara i qëndrojnë gjithmonë pranë këtyre institucioneve dhe nuk do të tërhiqen nga mbështetja e tyre. Ai sugjeroi që vizitat e diplomatëve shërbejnë për të forcuar moralin dhe pavarësinë e prokurorëve dhe hetuesve të SPAK në punën e tyre të vështirë dhe shpesh sfiduese.