Një incident i dhunshëm me thikë ka ndodhur sot rreth orës 16:30 pranë qendrës tregtare ‘’Ratina’’ në qytetin Tampere të Finlandës, duke lënë disa persona të plagosur. Policia ka reaguar shpejt duke arrestuar një 20-vjeçar, i cili besohet të jetë autori i sulmit.
Sipas raportimeve nga mediat lokale dhe dëshmitarëve okularë, disa persona janë plagosur në incident, megjithatë numri i saktë i viktimave dhe gjendja e tyre shëndetësore nuk janë konfirmuar ende plotësisht nga autoritetet. Një dëshmitar ka deklaruar për mediat finlandeze se ka parë dy persona të shtrirë në tokë, të mbuluar me gjak, të cilëve kalimtarët po u jepnin ndihmën e parë.
Policia ka rrethuar menjëherë zonën përreth qendrës tregtare ‘’Ratina’’ dhe ka bllokuar të gjitha hyrjet dhe daljet, duke mos lejuar kalimtarët të afrohen. Dëshmitarët e ngjarjes janë shoqëruar në katin e dytë të qendrës tregtare për t’u marrë në pyetje nga oficerët e policisë.
Autoritetet kanë njoftuar se situata është stabilizuar dhe nuk ka më rrezik për publikun. Megjithatë, hetimet janë ende në fazë të hershme dhe motivet e sulmuesit mbeten të panjohura. Punonjës të shërbimeve sociale dhe të emergjencës së krizave kanë mbërritur gjithashtu në vendin e ngjarjes për t’u ofruar ndihmë viktimave dhe personave të tjerë të prekur nga incidenti.
Qyteti i Tampere, me një popullsi prej rreth 260,000 banorësh, ndodhet rreth 180 kilometra në veri të Helsinkit. Policia lokale po vijon hetimet për të zbardhur të gjitha rrethanat e kësaj ngjarjeje të dhunshme.
