Një ngjarje e rëndë ka tronditur komunitetin shqiptar dhe atë italian, pas vrasjes së 25-vjeçarit Rivaldo Rusi në rrethana tragjike në Campania të Italisë. I riu humbi jetën pasi u qëllua me armë nga pronari italian i një vile gjatë një tentative grabitjeje.
Sipas raportimeve, Rivaldo Rusi ishte një nga tre të rinjtë shqiptarë që dyshohet se kishin hyrë në shtëpinë e biznesmenit 58-vjeçar Aurelio Valiante në zonën Foria di Centola me qëllim vjedhjeje. Valiante ka deklaruar se pasi ka dëgjuar zhurma në oborr, ka dalë jashtë me një pushkë gjahu dhe u ka bërë thirrje hajdutëve të ndalojnë. Ai pretendon se njëri prej tyre ka hapur zjarr i pari, duke e detyruar të qëllojë në vetëmbrojtje.
Plumbi fatal goditi Rivaldo Rusin në shpinë, duke i shkaktuar vdekjen e menjëhershme. Pas kësaj, biznesmeni Valiante dyshohet se e ka transportuar trupin e pajetë dhe e ka fshehur fillimisht në një fuçi vere dhe më pas e ka groposur në një zonë të largët. Këto veprime kanë shtuar dyshimet ndaj Valiante, i cili ndodhet në arrest shtëpie dhe është nën hetim për vrasje dhe fshehje të trupit.
Një tjetër shqiptar, Xhuljan Kurti, u plagos rëndë gjatë përplasjes me armë dhe u arrestua nga policia. Ai ndodhet në spitalin “Cardarelli” të Napolit nën mbikëqyrje policore. Ndërkohë, autoritetet italiane janë në kërkim të personit të tretë që dyshohet se ishte pjesë e grupit.
Bashkëshortja e viktimës, Veronika, ka shprehur dhimbjen e saj përmes një mesazhi prekës në rrjetet sociale, duke ndarë pikëllimin për humbjen e njeriut të saj të dashur.
Autopsia ka konfirmuar se plumbi i vetëm në shpinë ishte fatal. Policia po heton nëse pretendimi i Valiante për vetëmbrojtje është i vërtetë, ndërsa Kurti do të përballet me akuza për tentativë vjedhjeje, armëmbajtje pa leje dhe plagosje. Rivaldo Rusi, i cili jetonte në komunën Francolise prej disa vitesh, përshkruhet nga të afërmit si një djalë i heshtur dhe i dashur. Ngjarja tragjike ka ndezur debatin në Itali rreth ligjeve të vetëmbrojtjes.