Santos Cerdán, ish-sekretari organizativ i partisë në pushtet PSOE dhe njeriu i afërt i kryeministrit Pedro Sánchez, është vënë në paraburgim nga një gjykatë e lartë spanjolle, ndërsa po hetohet për akuza korrupsioni që kanë tronditur qeverinë qendër- të majtë.
Cerdán dha dorëheqjen më parë këtë muaj pasi një gjykatës gjeti “dëshmi të forta” për përfshirjen e tij në marrjen e ryshfeteve nga kontrata publike ndërtimi. Ai mohon akuzat për ryshfet, shpërdorim ndikimi dhe lidhje kriminale, por u ndalua dhe nuk iu dha liria me kusht.
Hetimi nisi pas materialeve të dorëzuara nga njësia anti-korrupsion e policisë Guardia Civil, të cilat tregojnë se Cerdán ka diskutuar për marrjen e ryshfeteve me ish-ministrin e transportit të PSOE, José Luis Ábalos, dhe një nga ndihmësit e tij, Koldo García, të cilët gjithashtu janë nën hetim dhe kanë mohuar akuzat.
Ky skandal është vetëm një nga hetimet e shumta që po godasin rrethin e kryeministrit Sánchez, i cili vetë përballet me akuza për lidhje me korrupsion që përfshijnë familjarët e tij, të cilët gjithashtu i mohojnë ato.
Pas vendimit të gjykatës, Sánchez tha: “Vepruam me vendosmëri dhe tani do të jetë gjyqësori ai që do të vendosë për përgjegjësinë e zotit Cerdán.”
Por lideri i partisë opozitare konservatore, Alberto Núñez Feijóo, e kritikoi ashpër duke kërkuar dorëheqjen e Sánchez dhe shpalljen e zgjedhjeve të parakohshme: “Personi që Sánchez zgjodhi vetë si numri dy i tij para vetëm gjashtë muajsh është sot në burg, i akuzuar për ryshfet dhe krime të tjera. Nëse kjo nuk kërkon dorëheqje dhe zgjedhje të reja, do të thotë se Sánchez ka humbur lidhjen me realitetin.”
Presioni politik në Madrid po rritet ndërsa skandalet e korrupsionit godasin rëndë qeverinë aktuale.