Tensionet në Lindjen e Mesme kanë arritur kulmin, ndërsa Irani dhe Izraeli kanë shkëmbyer sulme ajrore mëngjesin e së hënës. Pas këtyre sulmeve, ushtria izraelite ka njoftuar se ka kryer sulme ajrore ndaj gjashtë aeroporteve ushtarake në Iranin perëndimor, lindor dhe qendror.
Sipas deklaratës zyrtare të Forcave të Mbrojtjes së Izraelit (IDF), nga sulmet janë shkatërruar 15 mjete fluturuese, përfshirë avionë dhe helikopterë, si dhe janë dëmtuar rëndë pista uljeje, depo nëntokësore, një avion furnizimi dhe disa avionë luftarakë të tipit F-14, F-5 dhe AH-1, që i përkisnin forcave ajrore iraniane. “Avionët e shkatërruar ishin përgatitur për operacione kundër Forcave Ajrore të Izraelit dhe synonin të pengonin veprimtarinë e tyre mbi territorin iranian”, thuhet në deklaratë.
Paralelisht me këtë përshkallëzim, Teherani i ka paralajmëruar njëkohësisht Shtetet e Bashkuara se ushtria iraniane i ka tani “duart e lira” për t’i sulmuar objektivat amerikane, një ditë pasi SHBA-ja goditi fuqishëm objektet bërthamore të Teheranit.
Izraeli ka konfirmuar se sistemet e tij të mbrojtjes ajrore janë aktivizuar për të ndaluar sulmet iraniane, të cilat duket se kishin në shënjestër zonat veriore dhe qendrore të vendit, dhe u kërkoi qytetarëve të strehohen në bunkerë si masë paraprake. Irani e përshkroi sulmin si një valë të re të operacionit “Premtimi i Vërtetë 3”, duke thënë se po sulmonte qytetet izraelite të Haifës dhe Tel Aviv-it, sipas televizionit shtetëror iranian. Nuk pati raportime të menjëhershme për dëme të shkaktuara nga këto sulme.
Ndërkohë, në Teheran shpërthime të fuqishme kanë tronditur pjesë të kryeqytetit iranian. Forca Ajrore Izraelite ka konfirmuar se ka nisur një seri sulmesh ndaj objektivave ushtarake brenda Teheranit. Detaje të mëtejshme mbi shkallën e dëmeve nuk janë bërë ende publike.
Në një zhvillim tjetër, televizioni shtetëror iranian ka raportuar se objekti bërthamor nëntokësor i Fordow-it, një nga shënjestrat kryesore të sulmeve të fundjavës nga Shtetet e Bashkuara, është goditur sërish. Mediat izraelite, duke cituar burime të paidentifikuara, kanë thënë se sulmet e fundit ishin të fokusuara në rrugët që të çojnë drejt kompleksit dhe jo drejtpërdrejt në vetë objektin.
Ky shkëmbim i ndërsjellë i sulmeve vjen vetëm një ditë pasi Shtetet e Bashkuara u përfshinë drejtpërdrejt në konfliktin mes Izraelit dhe Iranit, duke sulmuar objektet bërthamore iraniane. Ky veprim amerikan ka ngjallur shqetësime të thella ndërkombëtare për një përshkallëzim të mëtejshëm të konfliktit në rajon. Irani ka reaguar duke theksuar se Shtetet e Bashkuara kanë kaluar “një vijë shumë të kuqe” me vendimin e tyre për të goditur tre objekte me raketa dhe bomba shkatërruese të destinuara për bunkerë.
Të hënën, gjenerali iranian Abdolrahim Mousavi, shefi i shtabit të përbashkët të forcave të armatosura, ka paralajmëruar ashpër Uashingtonin se sulmet amerikane u kanë dhënë forcave iraniane “duar të lira” për të “vepruar kundër interesave të SHBA-së dhe ushtrisë së saj”. Mousavi e ka cilësuar sulmin amerikan si një shkelje të qartë të sovranitetit të Iranit dhe e ka barazuar atë me një akt pushtimi, siç raporton agjencia shtetërore iraniane e lajmeve, IRNA.
Pas sulmeve amerikane ndaj Iranit, ka pasur reagime nga e gjithë bota, me thirrje të vazhdueshme për shtensionimin e konfliktit dhe një rikthim në diplomaci si rruga e vetme për të gjetur një zgjidhje të qëndrueshme. Të hënën, diplomatja e lartë e Bashkimit Evropian, Kaja Kallas, ka deklaruar se blloku mbetet “shumë i përqendruar në gjetjen e një zgjidhjeje diplomatike”. Ajo ka shprehur shqetësimin e madh të BE-së për mundësinë e hakmarrjes dhe përshkallëzimit të luftës, veçanërisht në lidhje me kërcënimet e Iranit për mbylljen e Ngushticës së Hormuzit, një rrugë detare jetike për transportin e naftës. Pas sulmeve të së dielës, zyrtarët iranianë kanë përsëritur kërcënimet e tyre të kahershme për mundësinë e mbylljes së kësaj rruge kyçe detare. Ministri i Jashtëm iranian, Abbas Araghchi, ka mbërritur të hënën në Moskë për një takim me Presidentin rus, Vladimir Putin, një nga aleatët kyç të Iranit.