Në një zhvillim që ka alarmuar autoritetet e sigurisë në Qipro dhe përtej saj, një burrë me origjinë nga Azerbajxhani është vënë në pranga nën dyshimet se ka kryer veprimtari spiunazhi në emër të Republikës Islamike të Iranit. Arrestimi i tij ka ngritur shqetësime serioze për sigurinë kombëtare të ishullit mesdhetar, si dhe për stabilitetin e operacioneve ushtarake perëndimore në rajon.
Sipas burimeve zyrtare, i dyshuari është ndaluar në qytetin bregdetar të Limasolit, ndërkohë që më pas është dërguar përpara gjykatës në Nikosia, ku është vendosur në paraburgim për tetë ditë, teksa hetimet janë ende në vijim. Policia dhe shërbimet e inteligjencës janë treguar tejet të rezervuara për detaje shtesë, duke përmendur nevojën për ruajtjen e sigurisë kombëtare dhe karakterin tepër të ndjeshëm të çështjes.
Sipas burimeve nga shërbimet perëndimore të inteligjencës, burri dyshohet të ketë mbikëqyrur dhe dokumentuar aktivitetin në dy prej objekteve më të rëndësishme ushtarake të Qipros: bazën ajrore britanike RAF Akrotiri dhe bazën ajrore qipriote Andreas Papandreu. Këto dy baza përbëjnë pika strategjike për operacionet ushtarake të NATO-s dhe aleatëve perëndimorë në Lindjen e Mesme, veçanërisht në kohë tensionesh të shtuara mes Iranit dhe Izraelit.
Hetuesit dyshojnë se i arrestuari vepronte nën drejtimin ose koordinimin e Forcës al-Quds, krahu i jashtëm i Gardës Revolucionare Islamike të Iranit (IRGC) – një strukturë e specializuar në operacione të fshehta, që përfshin spiunazh, atentate ndaj kundërshtarëve politikë të regjimit dhe aktivitet të dendur në rajonet me interes strategjik për Teheranin. Sipas të njëjtave burime, agjenti mund të ketë qenë i përfshirë në rrjete më të gjera të spiunazhit dhe të ketë përdorur territorin e Qipros si pikë vrojtimi dhe grumbullimi informacioni mbi aktivitetin ushtarak britanik.
