Autoritetet britanike kanë lëshuar një paralajmërim të fortë për jetën e qytetarëve, duke bërë të ditur se vala ekstreme e të nxehtit që ka përfshirë Anglinë dhe Uellsin mund të rezultojë fatale për qindra persona në ditët dhe javët në vijim. Agjencia e Sigurisë Shëndetësore të Mbretërisë së Bashkuar dhe ekspertë të ndryshëm të klimës dhe shëndetësisë janë bashkuar në një thirrje të përbashkët për të tërhequr vëmendjen ndaj rrezikut që po rritet me shpejtësi, ndërsa temperaturat kanë kapur nivele rekord.
Sipas llogaritjeve të bëra mbi modelet klimatike dhe të dhënat mjeko-statistikore, temperaturat aktuale – që kanë shënuar një rritje prej 2 deri në 4 gradë Celsius mbi normën shumëvjeçare – nuk do të ishin kaq të larta në mungesë të ngrohjes globale të shkaktuar nga aktiviteti njerëzor, kryesisht nga ndotja industriale dhe përdorimi masiv i lëndëve djegëse fosile.
Ekspertët paralajmërojnë se kjo valë e të nxehtit mund të shkaktojë vdekje të menjëhershme ose të përshpejtojë vdekjen tek mijëra qytetarë të rrezikuar, veçanërisht të moshuarit.
Parashikimet tregojnë se rreth 85% e viktimave të mundshme do të jenë mbi moshën 65 vjeç, të cilët janë më të ndjeshëm ndaj goditjes nga i nxehti, dehidratimit dhe përkeqësimit të sëmundjeve kronike si hipertensioni, sëmundjet kardiake apo respiratore. 