Ministri i Mbrojtjes së Izraelit, Israel Katz, ka lëshuar një deklaratë të ashpër ndaj udhëheqësit suprem të Iranit, Ali Khamenei, duke thënë se ai “nuk mund të lejohet më të ekzistojë”. Kjo deklaratë e fortë vjen pas një sulmi me raketa iraniane që goditi afër Spitalit Soroka në Beersheba, duke rritur ndjeshëm tensionet mes dy vendeve.
Duke folur me gazetarët në Holon, pranë Tel Avivit, Ministri Katz akuzoi drejtpërdrejt Khamenein se ka dhënë urdhra për të qëlluar mbi objekte civile. “Khamenei deklaron hapur se dëshiron që Izraeli të shkatërrohet, ai personalisht jep urdhra për të qëlluar spitalet. Ai e konsideron shkatërrimin e shtetit të Izraelit si një qëllim… Një njeri i tillë nuk mund të lejohet më të ekzistojë,” tha Katz, duke cituar media izraelite dhe agjencinë e lajmeve AFP.
Deklaratat e ministrit izraelit vijnë në një moment kritk të marrëdhënieve mes Izraelit dhe Iranit, teksa përplasjet e drejtpërdrejta ushtarake mes dy vendeve po intensifikohen. Sulmi me raketa pranë spitalit Soroka ka shkaktuar zemërim dhe dënim të fortë nga autoritetet izraelite.
Ndërkohë, media shtetërore iraniane ka reaguar duke mohuar kategorikisht që spitali të ketë qenë objektiv i qëllimshëm i sulmit. Sipas versionit iranian, sulmi kishte në shënjestër një lokacion ushtarak që ndodhej pranë Spitalit Soroka, dhe jo vetë institucionin mjekësor. Ky mohim vjen në përpjekje për të shmangur dënimin ndërkombëtar për shënjestrimin e mundshëm të infrastrukturës civile.
Konflikti midis dy vendeve ka hyrë në një fazë të re dhe të rrezikshme, ku retorika politike po ashpërsohet në mënyrë paralele me përshkallëzimin ushtarak në terren. Deklarata e Ministrit Katz, e cila sugjeron eliminimin e liderit suprem të Iranit, pritet të shkaktojë reagime të forta si në nivel diplomatik, ashtu edhe në skenën ndërkombëtare, duke rritur më tej frikën për një konflikt më të gjerë dhe të pakontrollueshëm në rajon.