Prej 25 vitesh, në shtëpinë ku Lavdia jeton me familjen e saj dhe të kunatit, Gazmendit, nuk ka pasur harmoni. Siç ajo parashtron problemin në “Shihemi në Gjyq” nga “E Diela Shqiptare” në Tv Klan, kunati i jep vazhdimisht urdhra dhe e fyen, kurse bashkëshorti nuk reagon, madje i thotë të mbyllë gojën.
Këto situata mes çiftit reflektohen edhe në studio, ndërsa Lavdia përshkruan më hollësisht sjelljet fyese të kunatit kundrejt saj.
Lavdie: Kurse ky zotëria që e kam këtu përpara…
Eni Çobani: Që është bashkëshorti yt ky zotëria që ia bën me gisht.
Lavdie: Po, bashkëshorti im.
Kliti: Mbylle gojën se jam unë zot shtëpie aty dhe do t’i zgjidh unë këto punë.
Lavdie: Po pse nuk i zgjidhe sot e 25 vite? Pse more burrë i dashur duhet të vij unë përpara publikut?
Kliti: Sepse besova shumë dhe…
Lavdie: Çfarë besove? Ti je bërë palë me vëllezërit e tu, a e kupton, a s’e kupton?
Kliti: Ti nuk e di se çfarë flet! Ta kesh të qartë, jam unë i zoti i atij vendi!
Eni Çobani: Zot i atij vendi dakord, por Gazmendi kush është tani? Se ti je Kliti, Gazmendi që i flet kësaj, i thotë mos dil te dera e shtëpisë, si i bëhet? Gazmendin a e ke vëlla ti?
Kliti: Gazmendi ka pjesën e vet.
Eni Çobani: Po mirë mo, pjesën e vet, por jeni bashkë aty. Lavdia thotë unë s’dal dot te dera e shtëpisë.
Lavdie: Nuk dal dot! Kur eci rrugës më thotë “o ec drejt, mos e kthe kokën as majtas, as djathtas, vetëm ec drejt! Unë vetëm nga shtëpia nuk ju nxjerr dot, por do të bëni siç them unë!”
Kliti vijon të ngulmojë se “do ta zgjidhë ai”, por nga ana tjetër nuk do diskutime me familjarët. Lavdia i kujton se ka duruar edhe ofendimet e kunatit dhe i duhet të përballet edhe me reagimet që bën pjesa tjetër e familjes pasi nxitet prej tij.
Kliti: Unë nuk prishem dot me gjithë njerëzit e mi!
Lavdie: Po prishem unë pra! Unë do të bëhem e keqja siç jam bërë deri më sot. A e di ti si më shan mua ai kur eci rrugës? “Ec mi xhuxhmaxhuxhe!” E di ti apo s’e di? Se më sheh kështu të shkurtër.
Eni Çobani: Po ti tani e ke lejuar këtë gjë që të të fyejë ai zotëri se po na habit, si të thotë xhuxhmaxhuxhe?
Lavdie: Jo 1 herë, por 100 herë më ka thënë! E plot se tani as nuk kujtohem…
Ardit Gjebrea: Por pse ta thotë ai këtë?
Lavdie: Problemi është gjithë shtëpia, z. Ardit. Për çdo gjë që ndodh aty, kjo e bën. Të gjithë njerëzit e burrit m’i hedh kundër!
Ardit Gjebrea: Ka ndonjë gjë personale me ty?
Lavdie: Nuk e di ç’ka, as vetë s’e di! Por fajin ma ka ky mua, nuk ma ka fajin njeri!
Kliti: Ti mbylle sqepin se këto punë do t’i zgjidh unë!