Dy vëllezër, 34 dhe 42 vjeç, janë arrestuar nga karabinierët në Quarto, pranë Napolit, me akuzën e vrasjes së babait të tyre, Antonio Di Gennaro, 71 vjeç. Trupi i viktimës u gjet i fshehur në një arkë në tarracën e shtëpisë së fëmijëve të tij.
Ngjarja u zbulua pasi partnerja e 71-vjeçarit raportoi në polici zhdukjen e tij. Hetimet zbuluan se babai ishte vrarë mëngjesin e 3 qershorit, pas një plani të dyshuar nga dy vëllezërit, të cilët dyshohet se i dhanë atij një pilulë gjumi të hedhur në kafe dhe më pas e mbytën me një jastëk, pasi ai refuzoi t’u jepte paratë e pensionit të nënës së tyre të ndjerë, shkruajnë mediat italiane.
Dy të arrestuarit, Michele Di Gennaro, inxhinier biomjekësor, dhe Andrea Di Gennaro, trajner personal, nuk kanë precedentë penalë. Gjatë marrjes në pyetje ata pranuan përgjegjësinë për ngjarjen e rëndë.
Karabinierët zbuluan trupin pas kontrollit në shtëpinë në Via Cicori, zonë qendrore në Quarto. Hetuesit po vijojnë hetimet për të zbardhur të gjitha rrethanat e vdekjes tragjike.