Një ngjarje e rëndë dhe e dhimbshme ka tronditur qytetin e Lushnjës, ku një grua e moshuar ka ndërruar jetë pak kohë pasi kishte marrë një injeksion në ambulancën e lagjes ku banonte. Viktima është një grua 78-vjeçare, e cila, sipas informacionit paraprak nga policia, dyshohet se pësoi një reaksion të menjëhershëm pas administrimit të medikamentit.
Ngjarja ka ndodhur në një nga ambulancat lokale të qytetit, ku e moshuara ishte paraqitur për të marrë mjekim. Pas injeksionit, ajo ka shfaqur shenja të rënda shqetësimi dhe është transportuar menjëherë drejt spitalit rajonal të Lushnjës, por pavarësisht ndërhyrjes së stafit mjekësor, 78-vjeçarja nuk ka mundur të mbijetojë.
Uniformat blu njoftojnë se rrethanat e plota të ngjarjes janë ende të paqarta dhe pritet që rezultatet e ekspertizës mjeko-ligjore të hedhin dritë mbi shkaqet konkrete të vdekjes.
Në fokus të hetimeve është identifikimi i saktë i medikamentit të administruar, nëse është përdorur ndonjë medikament i papërshtatshëm apo nëse pacientja ka pasur ndonjë alergji të njohur ndaj substancës së dhënë. Po ashtu, nuk përjashtohet mundësia që vdekja të ketë ardhur si pasojë e një problemi tjetër shëndetësor që është përkeqësuar në mënyrë të papritur.
Autoritetet policore kanë njoftuar se materialet procedurale lidhur me këtë rast i janë referuar Prokurorisë pranë Gjykatës së Shkallës së Parë të Juridiksionit të Përgjithshëm në Fier, ku do të zhvillohen hetime më të thelluara për të përcaktuar nëse kemi të bëjmë me neglizhencë mjekësore, një gabim gjatë trajtimit, apo një rast tragjik të paparashikueshëm.
“78-vjeçarja është dërguar me urgjencë në spitalin e Lushnjës, por pavarësisht ndihmës mjekësore që iu ofrua, ajo nuk arriti të mbijetojë. Po punohet intensivisht për përcaktimin e shkakut të humbjes së jetës”, thuhet në njoftimin zyrtar të policisë.
Ngjarja ka shkaktuar tronditje në komunitet, ndërsa familjarët e viktimës kërkojnë zbardhjen e plotë të rrethanave dhe ndëshkimin e përgjegjësve, nëse do të vërtetohet se bëhet fjalë për një gabim mjekësor.