Procesi i numërimit elektronik të votave në bashkinë e Vorës është ndërprerë papritur nga Komisioni Qendror i Zgjedhjeve, në një moment kur të dhënat paraprake tregojnë një epërsi të qartë të Partisë Demokratike dhe koalicionit opozitar.
Deri në momentin e ndërprerjes, ishin numëruar 6 qendra votimi, nga të cilat në 4 qendra ka dalë në avantazh koalicioni opozitar i udhëhequr nga PD. Kjo tendencë ka ngritur pikëpyetje për ndërprerjen e befasishme të procesit, ndërkohë që nga ana zyrtare nuk është dhënë ende asnjë shpjegim për arsyet teknike apo procedurale të këtij vendimi.
Kjo ndërprerje vjen në një moment kritik, ku opinioni publik dhe partitë politike janë në pritje të rezultateve të para konkrete nga numërimi elektronik, i cili është promovuar si një garanci për shpejtësi dhe transparencë maksimale të procesit.
Ndërkohë, kreu i KQZ-së, Ilirjan Celibashi, në një deklaratë të mëparshme për mediat, u shpreh se rezultatet përfundimtare të votimit elektronik pritet të shpallen ditën e nesërme, por nuk dha detaje nëse ndërprerja në Vorë është pjesë e një vendimi të qëllimshëm apo lidhet me probleme teknike.
Opozita ka ngritur shqetësime për këtë zhvillim, duke kërkuar sqarime të menjëhershme nga autoritetet zgjedhore dhe duke paralajmëruar se çdo vonesë e paarsyeshme në publikimin e rezultateve mund të cënojë besueshmërinë e procesit.