Tensionet gjatë procesit të votimit në qarkun e Dibrës kanë arritur kulmin këtë të dielë, ku një incident i rëndë është regjistruar rreth orës 13:00 në një prej qendrave të votimit në Maqellarë. Sipas raportimit të gazetares së Euronews Albania, një kandidat i Partisë Socialiste ka goditur fizikisht një komisioner të së njëjtës forcë politike, duke shkaktuar panik dhe shqetësim në ambientet e votimit.
Ky incident vjen në vazhdën e një klime të tensionuar që kishte nisur që prej mbrëmjes së kaluar në zonën e fshatit Pilafë, në të njëjtën bashki, ku përfaqësues të Partisë Demokratike dhe të Partisë Socialiste u përplasën ashpër për shkak të dyshimeve për veprimtari të paligjshme gjatë natës zgjedhore.
Sipas denoncimeve publike të Partisë Demokratike, në fshatin Pilafë janë parë dy automjete të dyshuara që lëviznin në orët e vona të natës dhe që pretendohet se po shpërndanin para në këmbim të votave.
PD ka shkuar më tej duke deklaruar se në këtë aktivitet të dyshuar kriminal është përfshirë edhe babai i kandidatit të PS-së, Daniel Gjura, i cili – sipas tyre – është filmur teksa angazhohej në blerje votash. Po sipas versionit të PD-së, situata ka degraduar kur është tentuar ndalimi i automjetit të dyshuar, duke çuar në një përplasje fizike dhe tension të lartë në vendin e ngjarjes.
Partia Demokratike pretendon se babai i kandidatit të PS-së është larguar me nxitim nga vendi i ngjarjes dhe, gjatë ikjes, ka qëlluar me armë zjarri në ajër, duke rrezikuar sigurinë e të pranishmëve dhe duke përshkallëzuar edhe më tej klimën e tensionuar në zonë.
Ndërkohë, autoritetet policore dhe hetimore nuk kanë dhënë ende një deklaratë zyrtare lidhur me këto ngjarje. Prania e forcave të rendit në qendrat e votimit është shtuar, ndërsa pritet që Prokuroria dhe SPAK të marrin në shqyrtim këto akuza serioze që prekin integritetin e procesit zgjedhor.
Zgjedhjet në Dibër kanë qenë tradicionalisht të ngarkuara me episode të tensionuara, por incidenti i sotëm dhe akuzat për përfshirje të drejtëpërdrejtë të familjarëve të kandidatëve në veprime kriminale, ngrejnë pikëpyetje të forta mbi rrjedhën dhe besueshmërinë e votimeve në këtë qark.