Kreu i Prokurorisë së Posaçme kundër Korrupsionit dhe Krimit të Organizuar, Altin Dumani, ka udhëtuar me urgjencë drejt Shkodrës, ku po zhvillohet një operacion i gjerë hetimor në lidhje me krimet zgjedhore. Burime të sigurta nga Policia e Shkodrës konfirmojnë se subjekt i procedimeve penale janë disa anëtarë të shtabit elektoral të Partisë Social Demokrate, e drejtuar nga deputeti Tom Doshi.
Operacioni po realizohet me bashkëpunimin e Byrosë Kombëtare të Hetimit, Policisë së Shtetit dhe SPAK, dhe ka përfshirë kontrolle intensive në zona të ndryshme të qarkut Shkodër, përfshirë Malësinë e Madhe, Barbullushin, Bushatin dhe Mjeden.
Të gjitha veprimet janë të lidhura me dyshimet për manipulim ose cenim të integritetit të procesit zgjedhor – një çështje që SPAK e ka regjistruar tashmë në procedim penal.
Në terren ndodhen agjentët e BKH-së, të asistuar nga forcat operacionale dhe patrullat e Policisë Vendore. Hetimet po mbikëqyren nga prokurori i posaçëm Dritan Prençi, i cili është i ngarkuar me çështjet e krimeve zgjedhore për këtë qark.
Operacioni është në vijim dhe pritet që gjatë orëve të ardhshme të ketë një deklaratë zyrtare mbi të arrestuarit apo provat e sekuestruara në funksion të hetimeve.