Një ngjarje e rëndë që mund të kishte përfunduar në tragjedi është parandaluar në kohë nga Policia e Tiranës, e cila arrestoi një 45-vjeçar që dhunonte bashkëshorten dhe fëmijët e mitur, si dhe qëlloi me armë zjarri ndaj efektivëve.
Sipas njoftimit zyrtar, forcat e Komisariatit Nr. 1, në bashkëpunim me Forcën e Posaçme “Shqiponja”, ndërhynë në një banesë në fshatin Kus, pasi kishin marrë informacion se një shtetas po ushtronte dhunë në familje dhe posedonte armë zjarri.
Rreth orës 23:00, në kuadër të operacionit të koduar “Forest”, Policia shkoi në banesën e shtetasit L. A., i cili, sapo pa uniformat blu, hapi zjarr me kallashnikov ndaj tyre. Menjëherë më pas, ai u largua në errësirë drejt një zone të pyllëzuar, duke i shpëtuar arrestimit të menjëhershëm.
Pas afro dy orësh kërkime intensive në pyll, forcat e Policisë arritën të lokalizojnë dhe neutralizojnë autorin, i cili u arrestua dhe u vu në pranga.
Gjatë ndalimit, në cilësinë e provës materiale, atij iu sekuestrua një armë zjarri kallashnikov me fishek në fole dhe një thikë që i posedonte pa leje. Policia konfirmon se përmes kësaj ndërhyrjeje është shmangur një ngjarje e mundshme me pasoja fatale për familjarët dhe punonjësit e rendit.
Materialet në ngarkim të të arrestuarit iu referuan Prokurorisë së Tiranës për veprime të mëtejshme procedurale.
Policia e Tiranës nënvizon se do të vijojë me vendosmëri ndërhyrjet për të parandaluar dhe goditur rastet e dhunës në familje dhe armëmbajtjes pa leje, duke garantuar sigurinë e komunitetit.