Ish-presidenti i Brazilit, Fernando Collor de Mello, është arrestuar pasi një gjyqtar i Gjykatës së Lartë hodhi poshtë ankesat e tij ndaj një dënimi të mëparshëm dhe urdhëroi që ai të fillojë vuajtjen e dënimit me burg.
Avokati i Collor-it, Marcelo Bessa, bëri të ditur se ish-kreu i shtetit u arrestua në orën 4 të mëngjesit të së premtes (ora 07:00 GMT), ndërsa po udhëtonte drejt kryeqytetit Brasília, ku kishte planifikuar të vetëdorëzohej pas urdhrit të arrestit të lëshuar nga gjyqtari i Gjykatës së Lartë, Alexandre de Moraes.
Sipas deklaratës së Bessa-s, politikani 75-vjeçar po mbahet nga policia federale në qytetin verilindor Maceió, kryeqyteti i shtetit Alagoas.
Urdhri i arrestimit nga Moraes u lëshua të enjten, pasi Gjykata e Lartë e dënoi Collor-in në vitin 2023 me tetë vite e dhjetë muaj burg për akuza për korrupsion dhe pastrim parash. Collor ishte presidenti i parë i zgjedhur me votë popullore pas përfundimit të diktaturës ushtarake në Brazil më 1985.
Avokati i tij kishte shprehur më herët “habinë dhe shqetësimin” për vendimin e Moraes, por kishte deklaruar se ish-presidenti do të respektonte urdhrin e gjykatës.
Dënimi i vitit 2023 erdhi pas akuzave nga prokurorët brazilianë, të cilët e akuzuan Collor-in se kishte marrë rreth 30 milionë realë brazilianë (rreth 5.28 milionë dollarë amerikanë) në formë rryshfetesh nga një ish-degë e kompanisë shtetërore të naftës Petrobras.
Collor mori detyrën si president në vitin 1990, por nuk e përfundoi mandatin pasi Kongresi votoi për shkarkimin e tij vetëm dy vite më vonë, mes një skandali të veçantë korrupsioni, për të cilin Gjykata e Lartë e shpalli të pafajshëm në vitin 1994.