Një grua biznesmene është përfshirë në hetimet intensive që po zhvillohen lidhur me atentatin e ndodhur në Tiranë javën e kaluar, ku katër persona, mes tyre dy fëmijë, mbetën të plagosur rëndë. Burime nga grupi hetimor kanë konfirmuar se ajo është marrë në pyetje për disa orë, pasi rezulton se ka një lidhje të tërthortë me automjetin që dyshohet të ketë qenë në shënjestër të autorëve.
Lajmi është bërë publik nga gazetarja Klodiana Lala në emisionin “Opinion” në Tv Klan, ku zbuloi se gruaja e identifikuar me inicialet A.M., është thirrur nga hetuesit për të sqaruar rrethanat rreth përdorimit të një mjeti tip Benz G-Class, të cilin ajo ia kishte dhënë përkohësisht gruas së të ndjerit Roan Brahimi.
Sipas gazetares, ky detaj ka rëndësi të veçantë për hetimin, pasi dyshohet se atentatorët kanë pasur për shënjestër pikërisht bashkëshorten e Roan Brahimit — një personazh i përfshirë më herët në episode kriminale — por mund të kenë ngatërruar objektivin për shkak të ngjashmërisë së automjeteve. Mjeti që u qëllua me breshëri plumbash ishte gjithashtu një Benz G-Class, ndërsa makina në fjalë që është në fokus të hetimit, sipas burimeve, ndryshon vetëm një shkronjë në targë.
“Është një çështje shumë e ndërlikuar dhe po hetohet me shumë kujdes. Biznesmenia A.M. është marrë në pyetje për orë të tëra, pasi dyshohet se automjeti i saj është përdorur përkohësisht nga gruaja e Roanit, dhe kjo ka sjellë ngatërrimin e mundshëm të shënjestrës”, u shpreh Lala.
Në atentatin e rëndë mbetën të plagosur katër persona: shoferi i familjes, një 19-vjeçar dhe dy vëllezër të mitur, Dior dhe Marko Demiraj, përkatësisht 11 dhe 17 vjeç. Fëmijët po udhëtonin drejt shtëpisë pasi kishin festuar ditëlindjen e vogëlushit në një pistë garash në Shijak. Autorët qëlluan mbi automjetin pranë mbikalimit të Farkës dhe më pas u larguan pa lënë gjurmë.
Aktualisht, Dior, 11 vjeç, ndodhet në një spital në Itali në gjendje të rëndë shëndetësore dhe po kurohet me trajtim të specializuar. Vëllai i tij dhe pjesa tjetër e të plagosurve janë jashtë rrezikut për jetën.
Hetimet vijojnë në disa pista, përfshirë hakmarrje të mundshme të lidhura me të shkuarën kriminale të Roan Brahimit dhe konfliktet që ai ka pasur me grupe rivale. Policia ende nuk ka identifikuar autorët e atentatit, por analizat mbi mjetet, lëvizjet dhe lidhjet e personave të përfshirë mund të sjellin zhvillime të reja në ditët në vijim.