Një tragjedi ka tronditur përgatitjet e kombëtares braziliane për ndeshjen kundër Argjentinës, e vlefshme për kualifikueset e Kupës së Botës 2026. Pak para fillimit të seancës stërvitore të planifikuar në stadiumin Mané Garrincha në Brasilia, një punëtor i ngarkuar për ngritjen e një skene mbeti viktimë e një goditjeje elektrike vdekjeprurëse.
32-vjeçari është ndihmuar menjëherë nga stafi mjekësor i pranishëm, të cilët kanë tentuar për një kohë të gjatë për ta ringjallur me manovra kardiopulmonare. Fatkeqësisht, pas rreth një ore përpjekjesh, ai u deklarua i vdekur.
Zjarrfikësja raportoi: “Ai ishte në arrest kardiak kur ekipet e shpëtimit mbërritën, përpjekjet për reanimim zgjatën rreth një orë, por rezultuan të pasuksesshme. Rrethanat e aksidentit janë ende duke u sqaruar”.
Episodi tragjik preku në mënyrë të pashmangshme edhe kombëtaren braziliane të drejtuar nga Dorival Júnior, i cili po përgatitej të zhvillonte një nga seancat e fundit përpara se të nisej për në Buenos Aires. Stërvitja u shty me më shumë se një orë, por skuadra vendosi të vazhdojë përgatitjet për shkak të sfidës shumë delikate ndaj Albicelestes më 26 mars.