Ndeshja e La Liga mes Barcelonës dhe Osasunës nuk do të zhvillohet sot. Vendimi i papritur është marrë pak minuta para fillimit të sfidës dhe ka qenë vetë presidenti i katalanasve, Joan Laporta, ai i cili ua ka komunikuar ekipeve.
Më pas u bë e ditur se ishte ndarë nga jeta në pasditen e sotme mjeku i ekipit, Karlos Minarro Garsia, ndaj ishte vendosur që të shtyhej kjo ndeshje në një afat të pacaktuar.
Sipas medieve iberike, doktori Carles Minarro García (40 vjeç) ka ndërruar jetë në hotelin ku ishte grumbulluar Barcelona. Fataliteti ka ndodhur pasi ka ngrënë me ekipin dhe ka shkuar në dhomën e tij për të pushuar. Ai u gjet pa jetë aty në momentin që stafi kuptoi se po vonohej për t’u ngjitur në autobus dhe diçka kishte ndodhur. Garcia ishte një mjek sportiv i përkushtuar që shërbeu si doktor i ekipit të parë të Barcelonës që prej vitit 2017.