Gjatë intervistës të realizuar për Report.Tv, kryebashkiaku Veliaj më tej foli dhe për detaje të tjera nga dosja hetimore.
Ai u shpreh se nuk ka pasur në plan asnjë arratisje duke përmendur një vizitë të tij në Gjermani dhe 2 në SHBA, nga të cilat thotë se u kthye pasi nuk i trembet këtij persekutimi.
Gjithashtu akuzat për prishje provash ai i hedh poshtë, ndërsa thotë se një prokuror ndërtues po bën lolo gjithë sistemin e drejtësisë.
Pyetje: Si qëndron e vërteta e arratisjes apo prishjes së provave për të cilat flitet se ju do të prishnit procesin?
Erion Veliaj: Çfarë arratisje? Isha në Gjermani më 6 Dhjetor dhe erdha; në SHBA në 31 Dhjetor dhe 21 Janar dhe erdha! Tre herë kam provuar se as iki, as tutem nga ky persekutim. Cilat prova do prish? Këtu prova quhen lodrat e djalit; i ka Olsi, të luajë gjithë ditën si kalama me lego. Provë quhet Instagrami, aty i ka! Kjo është çmenduri, një ndërtues i babëzitur po bën lolo gjithë sistemin e drejtësisë.
Sakaq kujtojmë se kryedemokrati Sali Berisha është shprehur se Veliaj ka tentuar të udhëtojë drejt SHBA për t’iu arratisur drejtësisë.