Një lëvizje e papritur raportohet se po përgatitet në administratën shtetërore, ku drejtuesit e institucioneve në varësi të ministrive mund të përballen me kërkesën për të dorëzuar dorëheqjen. Kryeministri Edi Rama mësohet se ka komunikuar me anëtarët e kabinetit qeveritar gjatë qëndrimit të tij në Budva, duke u kërkuar të nisin një proces largimesh në nivelet drejtuese të administratës.
Sic raporton VoxNews, ministrat janë udhëzuar të thërrasin gjatë pasdites drejtuesit e institucioneve që kanë në varësi dhe t’u kërkojnë dorëheqjen e parevokueshme. Nëse kjo kërkesë zbatohet, ndryshimet mund të përfshijnë një pjesë të konsiderueshme të institucioneve shtetërore, mes tyre administratën tatimore dhe doganore, Kadastrën, Qendrën Kombëtare të Biznesit dhe Autoritetin Kombëtar të Ushqimit.
Nga kjo lëvizje mund të preken gjithashtu institucione në varësi të ministrive të Shëndetësisë, Drejtësisë, Bujqësisë, Infrastrukturës dhe Kulturës. Ende nuk është bërë e ditur nëse dorëheqjet do të pasohen nga emërime të reja apo nëse bëhet fjalë për një riorganizim më të gjerë të strukturave drejtuese.
Raportimi vjen në një periudhë tensionesh pas protestave të fundit, ndërsa kryeministri ka shprehur vazhdimisht pakënaqësi për mënyrën se si funksionojnë disa hallka të administratës publike. Vetëm pak ditë më parë, ai paralajmëroi se drejtuesit dhe punonjësit që nuk respektojnë afatet për trajtimin e kërkesave të qytetarëve duhet të mbajnë përgjegjësi. “Kur ti i vonon dhe del nga afati, ti duhet të marrësh koston tënde dhe këtë gjë ne do ta bëjmë me ligjin e Pasqyrës, në të cilin ne do të përcaktojmë se çdo shkelje afati duhet të ketë përgjegjësin dhe përgjegjësi duhet të marrë koston”, deklaroi Rama.
Kreu i qeverisë ka prezantuar edhe mekanizmin e quajtur “Shkalla e Meritës”, si pjesë të ndryshimeve që synohen në administratën publike. Megjithatë, nuk është ende e qartë nëse kërkesa e raportuar për dorëheqje është pjesë e këtyre ndryshimeve apo lidhet me zhvillimet e fundit politike dhe protestat.
Deri më tani nuk ka një konfirmim zyrtar nga Kryeministria për një urdhër të përgjithshëm dorëheqjeje, ndërsa mbetet për t’u parë nëse gjatë orëve apo ditëve të ardhshme do të ketë lëvizje konkrete në drejtimin e institucioneve shtetërore.
