Ambasada e SHBA-së në Tiranë ka bërë thirrje për protesta paqësore, pas tensioneve të regjistruara ditët e fundit në kryeqytet, ku demonstratat janë shoqëruar me përplasje mes protestuesve dhe Policisë, si dhe me dëmtime të pronës publike e private.
Në një përgjigje për mediat që kanë kërkuar një koment mbi situatën, përfaqësia diplomatike amerikane ka vënë theksin te respektimi i ligjit dhe ushtrimi paqësor i së drejtës për protestë.
“Nxisim qytetarët që marrin pjesë në protesta ta shprehin qëndrimin e tyre në mënyrë të ligjshme dhe paqësore. Aktet e dhunës nuk janë pjesë e angazhimit qytetar”, thuhet në reagimin e Ambasadës së SHBA-së.