Studenti shqiptar Ferdinand Nokaj, 25 vjeç, është gjetur së fundmi pa jetë në brigjet e lumit Adige, në Grumo të Italisë. Sipas mediave të huaja, trupi i të riut u gjet më 5 shtator, por familja e tij nuk kishte dijeni se ai ndodhej në morgun e spitalit Santa Chiara, në Trento.
Ndërsa më 25 shtator, babai i tij arriti ta identifikonte përmes fytyrës dhe një tatuazhi në gjoks. Familjarët shprehen se rreth tre orë para se të zhdukej, Ferdinandi u kishte treguar se ishte sulmuar në Rovereto nga disa të rinj shqiptarë.
25-vjeçari kishte shenja në fytyrë dhe ishte i frikësuar, ndërsa babai i tij e kishte këshilluar të shkonte menjëherë te karabinierët. “Edhe unë këtë po mendoj, baba”, i ishte përgjigjur Ferdinandi.
Më pas, 25-vjeçari kishte telefonuar vëllain e tij nga stacioni i trenit në Rovereto. Por pas asaj telefonate, familja nuk arriti të kontaktonte më me të.
Pas sulmit, Ferdinandi kishte publikuar gjithashtu një foto nga sulmi në Instagram. Familja e tij kishte ruajtur atë, ku shenjat në fytyrën e të riut ishin të dukshme. Të nesërmen, vëllai i tij u paraqit te Karabinierët në Fano dhe raportoi zhdukjen e 25-vjeçarit.