Ditën e djeshme janë bërë plot 52 ditë pa shqiptarin Roland Sala, i cili pas dy javësh në koma dha frymën e fundit pasi dallgët e detit në Kretë e morën përpara, duke i shkaktuar atij asfiksi. Prej gati dy muajsh familja Sala jeton me dhimbjen e humbjes tragjike të njërit prej djemve të saj, ndërsa vëllai kujton mes lotësh Rolandin.
Një reagim prekës ka ardhur së fundmi nga vëllai i Rolandit, i cili zemërthyer shkruan se mungesa e tij dhemb çdo ditë.
“52 ditë pa ty, vëllai im… Mungesa jote dhemb çdo ditë, por kujtimi yt do të jetojë përgjithmonë në zemrat tona. U prehsh në paqe” shkruan vëllai i Rolandit në dedikimin e bërë së fundmi.
Siç kemi raportuar dhe ne më parë Rolandi u nda nga jeta në lule të rinisë, vetëm 33 vjeç pasi duke bërë plazh, u përfshi nga dallgët e detit, çka i shkaktoi atij asfiksi. Ai u transportua menjëherë në Spitalin e Rethimnos, ku qëndroi për rreth dy javë nën kujdesin e mjekëve, duke luftuar për jetën. Pavarësisht përpjekjeve të tyre, më 28 korrik të këtij vitit ai mbylli sytë përgjithmonë.
Lajmi tragjik ka tronditur familjen dhe gjithë komunitetin shqiptar në qytetin e Rethimnos, në Kretë. Ikja e Rolandit ka lënë pas një dhimbje të pashërueshme për familjen e tij, të cilët kujtojnë me lot në sy djalin e tyre.