Protestuesit në ditën e 102 kanë zgjedhur të bllokojnë disa akse rrugore të kryeqytetit, ku disa qytetarë janë ulur këmbëkryq në mes të rrugës.
Qytetarët kanë bllokuar disa akseve kryesore të kryeqytetit, mes tyre kryqëzimin te Rruga e Elbasanit dhe kryqëzimin që të çon në drejtim të Sheshit “Skënderbej”, si dhe kanë paralajmëruar që do të bllokojnë çdo kryqëzim ku do të marshojnë sonte në kryeqytet.
Ata fillimisht nisën në urën e madhe të unazës, duke mos lejuar makinat dhe urbanët që të qarkullojnë. Njëzëri qytetarët dëgjohen duke brohoritur në kor: Rama në burg, Berisha në burg.
Po ashtu qytetarët mbajnë në duar disa pankarta, përmes të cilave u bëjnë thirrje studentëve që t’u bashkohen protestës.
Protesta zhvillohet në kuadër të tubimit kundër qeverisë dhe kryeministrit Edi Rama. Protestuesit kanë vijuar me thirrjet kundër qeverisë, ndërsa një pjesë e tyre kanë zgjedhur bllokimin e akseve rrugore si formë presioni dhe përshkallëzimi të aksionit.
Bllokimi i rrugëve është shndërruar në një nga format e përdorura nga protestuesit gjatë tubimeve të fundit në Tiranë, duke sjellë pasoja të drejtpërdrejta në qarkullimin urban.