ër gati 25 ditë me rradhë, Rozalinda alias Rosela Nallbati, (mbesa e ish-Drejtorit të Policisë Kriminale në Policinë e Shtetit, Neritan Nallbati dhe e forta e grupit kriminal “Çapja” në Elbasan), dyshohet se qëndroi e fshehur në zonën e “Oxhakut” në Tiranë, për t’u vetëparaqitur më pas në ambjentet e komisariatit Nr.6 në Tiranë.
Sipas një njoftimi të Policisë së Tiranës, ajo ishte shpallur në kërkim qysh prej datës 30 korrik 2026, për shak se ndaj 33-vjeçares ka filluar një çështje penale në prokurorinë e Tiranës, për akuzën e “Goditjes për shkak të detyrës”, pasi qëlloi qëlloi me telefon gazetarin e Kronikës së Zezë, Elton Qyno.
Por e “forta” e “Çapjave” me profesion Mjeke, vendosi të dorëzohet në ambjentet e komisariatit Nr.6 në Tiranë, pasi ishte informuar se gjyqtari i Tiranës, Altin Abdiu, kishte vendosur ndaj saj dy masat e sigurisë “Ndalim i daljes jashtë shtetit”, “Detyrim paraqitje pranë OPGJ” dhe njëherësh kishte urdhëruar prokurorinë ti bllokonte pasaportën kësaj doktoreshe.
Në fund të muajit Gusht 2026, Rozalinda Nallbati, u paraqit para gjyqtarit Altin Abdiu, duke kërkuar heqjen e masave të sigurisë dhe lejimin për të dalë jashtë shtetit, pasi pretendoi se ka dy fëmijë të vegjël dhe i duhej ti rregjistronte në shkollë në Dubai.
Përmes nevojës për shkollimin e fëmijëve, Rozalinda, bindi gjyqtarin Altin Abdiu, të ndryshojë masën e sigurisë duke i hequr “Ndalimin e daljes jashtë shtetit” dhe lënë në fuqi masën e “Detyrimit për tu paraqitur pranë oficerit të policisë gjyqësore. Pavarësisht kësaj, çështja penale kundër saj vijon të jetë e hapur dhe ndaj Rozalinda alias Rosela Nallbatit, po kryen hetime për veprën penale të “Goditjes për shkak të detyrës” në dëm të gazetarit Elton Qyno. E gjithë ngjarja ndodhi në ambjentet e Spitalit Amerikan në Tiranë.
Por rasti me gazetarin Elton Qyno nuk është i izoluar. Rozalinda Nallbati rezulton të ketë pasur dhe precedentë të tjerë të kësaj natyre me veprime të dhunshme, presione psikologjike dhe kërcënime.
Një burim pranë policisë së Tiranës kujtoi se mbesa e Neritan Nallbatit, Rozalinda Nallbati, të njëjtin incident ka bërë dhe me gazetarin e njohur, Artan Hoxha. Rasti është rregjistruar para disa kohësh në ambjentet e një lokali pranë zonës së “Kinostudios”, kur në lokal është shfaqur Rozalinda Nallbati, së bashku me një femër tjetër.
Ajo ka sulmuar fizikisht gazetarin Artan Hoxhën dhe ka lëshuar sharje dhe ofendime drejt tij. Skena është parë nga klientët e tjerë të lokalit, por vetë gazetari për incidentin në fjalë, nuk ka bërë kallëzim penal në polici.
Doktoresha, që tashmë është natyralizuar në “të fortën” e Elbasanit dhe Tiranës, pasi xhaxhin, Neritan Nallbati, e kishte Drejtor të Policisë Kriminale në Policinë e Shtetin dhe burrin Florenc Çapjan e ka të dënuar me burgim të përjetshëm, mendon se i bie kujdo njeriu në rrugë, në lokal, në servis dhe në spital etj.
Rozalinda Nallbati ka precedent tjetër të dhunimit dhe dëmtimit të pronës, rast i cili sipas burimeve të policisë është rregjistruar rreth muajit Maj 2026 në qytetin e Elbasanit.
E forta e “Çapjave” këtë rradhë ka sulmuar Raif Çaushllarin, vëllain e Elvis Çaushllarit që në Elbasan njihet si “Vis Korçari” aktualisht në burg, shok i ngushtë i Florenc Çapjas dhe Bledar Muçës.
Raif Çaushllari, ndodhej në ambjentet e servisit të tij në rrugën “Çerçiz Topulli” në Elbasan, ku ka ngritur një biznes të vogël familjar për shitjen dhe riparimin e motorave elektrikë dhe me benzinë. Por në këtë biznes është shfaqur me makinë Rozalinda Nallbati, duke i dëmtuar disa motorë që i kishte nxjerë për reklamim shitje dhe njëherësh, ka sulmuar me fjalë fyese dhe duke e quajtur “Tradhtar” të vijës kriminale të grupit “Çapja”, Raif Çaushllarin dhe vëllain e tij, “Vis Korçarin”.
Sipas burimeve të policisë edhe në këtë rast, Raif Çaushllari, nuk u paraqit në polici për të bërë denoncim, megjithëse ju dëmtuan disa motorë nga goditja me makinë që i bëri doktoresha Rosela Nallbati. Por kjo ngjarje kujtohet shumë mirë në Elbasan dhe për më tepër edhe policia është informuar për rastin në rrugë operative.