Një ngjarje e rëndë ka ndodhur në orët e para të mëngjesit të sotëm në zonën e Beneventos në Itali, ku një burrë ka vrarë me armë zjarri dy vëllezërit e tij dhe më pas i ka dhënë fund jetës.
Sipas mediave italiane, ngjarja ka ndodhur në një restorant-hotel në Apice, në provincën e Beneventos, para se lokali të hapej për shërbim. Gjatë një debati, njëri prej vëllezërve ka qëlluar në drejtim të dy vëllezërve të tjerë dhe më pas ka qëlluar veten.
Menjëherë në vendngjarje kanë shkuar shërbimet e policisë dhe ekipet e emergjencës, të cilat kanë konstatuar të tre të vdekur. Hoteli ku ndodhi tragjedia ishte një biznes familjar, i drejtuar nga tre vëllezërit.
Autoritetet ndodhen në vendngjarje dhe kanë nisur hetimet për të zbardhur shkaqet dhe rrethanat që çuan në këtë ngjarje.