Në një kohë kur vendet fqinje si Greqia po ndërmarrin masa drastike për të ulur kostot e jetesës të qytetarëve, në Shqipëri situata sa vjen dhe bëhet më e vështirë, me çmime që çdo ditë bëhen të papërballueshme, ndërsa kryeministri Rama merret me platforma komunikimi me qytetarët.
Në Greqi sot ka nisur një nismë kombëtare për uljen e çmimeve në supermakrete për më shumë se 1600 produkte. Uljet do të zgjasin deri në 4 muaj dhe parashikojnë një zbritje deri në 30%. Kjo bëhet për të lehtësuar kostot e larta të familjeve.
Po në Shqipëri çfarë po ndodh?
Sipas të dhënave të fundit të Eurostat çmimet e ushqimeve dhe pijeve joalkoolike në Shqipëri u rritën me 3.2% në korrik 2026, krahasuar me të njëjtin muaj të një viti më parë ose pesë herë më shumë se në Bashkimin Europian ku shtrenjtimi ishte vetëm 0.6%.
Nga renditja e Eurostat-it rezulton se Shqipëria ishte e pesta me normën më të lartë të inflacionit të ushqimeve mes 36 vendeve europiane. Norma më të larta u regjistruan vetëm në Turqi, me 37.6%, Rumani, me 4.6%, Qipro, me 4.5%, dhe Islandë, me 4.4%.
Shqiptarët vijojnë të kenë të ardhura dhe fuqi blerëse ndër më të ulëtat në Europë, por kur bëhet fjalë për ushqimet, po paguajnë çmime më të larta se mesatarja e Bashkimit Europian.
Sipas të dhënave më të fundit të Eurostat, çmimet e ushqimeve në Shqipëri kanë arritur në 102.9% të mesatares së BE-së në vitin 2025, nga 99.6% një vit më parë. Kjo do të thotë se një shportë ushqimore që kushton 100 euro në BE, në Shqipëri kushton mesatarisht 103 euro, e matur sipas fuqisë blerëse.
Ndërkohë, të ardhurat për frymë të shqiptarëve mbeten vetëm 43% e mesatares europiane, ndërsa konsumi individual për frymë arrin në 48%. Shqipëria renditet ndër vendet e fundit në Europë për këta tregues, duke lënë pas vetëm pak vende të rajonit. Panorama