Një ngjarje e rëndë ka tronditur pasditen e kësaj të diele zonën e Dukagjinit në Shkodër, ku dy persona kanë humbur jetën dhe një tjetër ka mbetur i plagosur pas të shtënave me armë zjarri.
Lidhur me këtë tragjedi një reagim zyrtar ka ardhur dhe nga Policia e Shtetit e cila ka bërë me dije se ngjarja ka ndodhur në fshatin Mgull të Dukagjinit ku babë e bir janë vrarë me armë zjarri.
Sipas të dhënave paraprake, viktimat janë Lekë Gjoni dhe Prelë Gjoni, ndërkohë i plagosur nga të shtënat ka mbetur shtetasi Lazër Bashi.
Ka qenë një telefonatë që ka mbërritur në Policinë e Shkodrës ajo e cila ka ngritur alarmin dhe ka informuar autoritetet për këtë ngjarje. Menjëherë pas marrjes së njoftimit, forcat e Policisë janë nisur drejt vendit të ngjarjes për të verifikuar informacionin dhe për të zbardhur rrethanat e incidentit.
Burimet paraprake bëjnë me dije se dy personat e plagosur rëndë nuk kanë mundur t’u mbijetojnë plagëve të marra, ndërsa një person i tretë ka mbetur i plagosur.
Sakaq theksojmë se forca të shumta policie janë nisur drejt fshatit Mgull, por për shkak të pozicionit gjeografik të zonës puna e autoriteteve është vështirësuar. Dukagjini është një territor i thellë malor, disa orë larg qytetit të Shkodrës, ndërsa në pjesë të ndryshme të zonës mungon edhe sinjali telefonik.
“Rreth orës 17:20, në fshatin Mgull, Njësia Administrative Pult, Dukagjin, dyshohet se janë vrarë me armë zjarri shtetasit L. Gj. dhe P. Gj., babë e bir. Forca të shumta të Policisë Vendore dhe të Forcës Kombëtare të Sigurisë, Njësia Shkodër, janë nisur drejt vendngjarjes.
Ndërkohë, është ngritur një grup i posaçëm hetimor, i cili po shkon në vendngjarje, për zbardhjen e plotë të rrethanave, dokumentimin ligjor të ngjarjes, si dhe identifikimin dhe kapjen e autorit/autorëve”, thuhet në njoftimin e Policisë.