Një gjykatë federale në Nju Jork ka rrëzuar vendimin e administratës së presidentit Donald Trump për të bllokuar dhënien e vizave të emigrimit për shtetasit e Shqipërisë dhe të 74 vendeve të tjera, duke e cilësuar masën në kundërshtim me ligjin federal amerikan.
Vendimi është dhënë nga gjykatësja federale Jeannette Vargas, e cila ka arritur në përfundimin se Departamenti Amerikan i Shtetit ka tejkaluar kompetencat e tij duke pezulluar procedurat për këtë kategori vizash.
Sipas arsyetimit të gjykatës, masa binte ndesh me ligjin federal të vitit 1965, i cili ndalon diskriminimin e aplikantëve për viza emigrimi mbi bazën e kombësisë. Gjykata vlerësoi gjithashtu se Departamenti i Shtetit nuk kishte autoritetin e nevojshëm ligjor për të vendosur një bllokim të përgjithshëm ndaj aplikantëve vetëm për shkak të shtetit nga i cili vinin.
LEXO EDHE: Ngjarje e rende ne Korce, raportohet per viktima
Çështja kishte përfunduar në gjykatë pas një padie të ngritur nga organizata që mbrojnë të drejtat e emigrantëve, së bashku me aplikantë të prekur drejtpërdrejt nga pezullimi. Ata argumentuan se vendimi i administratës kishte ndërprerë në mënyrë të paligjshme proceset e emigrimit, duke lënë familje dhe aplikantë për punësim në pritje për një periudhë të pacaktuar.
Sipas raportimit të CNN, Departamenti Amerikan i Shtetit dhe Shtëpia e Bardhë nuk kanë dhënë ende një qëndrim zyrtar mbi vendimin. Gjykatësja Vargas u ka lënë palëve afat deri më 11 shtator për të paraqitur propozimet lidhur me mënyrën se si duhet të zbatohet vendimi, si dhe për hapat e mundshëm proceduralë që mund të përfshijnë edhe apelimin e tij.
LEXO EDHE: Tragjedi familjare, gjyshja helmon vajzën dhe 4 nipërit
Administrata amerikane kishte vendosur në muajin janar pezullimin pa afat të një pjese të konsiderueshme të vizave të emigrimit për shtetasit e 75 vendeve. Mes shteteve të prekura ishte edhe Shqipëria, së bashku me vende si Brazili, Kolumbia, Egjipti, Somalia dhe Rusia.
Argumenti i përdorur nga administrata ishte se aplikantët që vinin nga këto vende mund të kishin probabilitet më të lartë për t’u mbështetur në programet publike dhe skemat e ndihmës sociale pas mbërritjes në Shtetet e Bashkuara. Masa prekte shtetas të vendeve që përbënin pothuajse 40% të shteteve të botës.
Pezullimi përfshinte vizat e emigrimit, pra kategoritë që mundësojnë vendosjen e përhershme në SHBA dhe që në shumë raste çojnë drejt marrjes së lejes së përhershme të qëndrimit, të njohur si “Green Card”. Mes tyre përfshihen vizat për bashkim familjar, si dhe disa kategori vizash që lidhen me punësimin dhe qëndrimin e përhershëm.
LEXO EDHE: DALIN PAMJET/ Momenti kur autori i maskuar i zë pritë dhe qellon drejtorin e njohur, ai bie përtokë! (VIDEO E RENDE)
Ndërkohë, masa nuk kishte prekur vizat joemigruese, të cilat përdoren për qëndrime të përkohshme në Shtetet e Bashkuara. Për pasojë, vizat turistike, studentore dhe kategori të tjera të përkohshme nuk ishin pjesë e këtij bllokimi.
Rrëzimi i masës nga gjykata përbën një zhvillim të rëndësishëm edhe për aplikantët shqiptarë që presin procedurat e emigrimit drejt SHBA-së. Megjithatë, mënyra konkrete se si do të rifillojnë procedurat dhe nëse administrata Trump do ta apelojë vendimin pritet të bëhet më e qartë pas afatit të vendosur nga gjykata më 11 shtator.