Moti i keq ka goditur disa zona të Italisë dhe Gjermanisë, duke sjellë reshje intensive, mijëra rrufe, përmbytje dhe tornado. Problemet më të mëdha në Itali janë regjistruar në Liguria, ndërsa autoritetet kanë ngritur nivelin e alarmit edhe në Toskanë. Në Gjermani, bilanci është më i rëndë, me të paktën një viktimë, të plagosur dhe dëme të konsiderueshme materiale.
Në rajonin italian të Ligurias janë regjistruar rreth 40 mijë rrufe, më shumë se 20 mijë prej tyre vetëm në zonën e Gjenovës.
Një nga rrufetë goditi trenin Frecciabianca 8601, i cili ishte nisur nga Gjenova me destinacion Romën. Treni mbeti i ndaluar në zonën e Tigullios për shkak të një defekti teknik të shkaktuar nga goditja, ndërsa pasagjerët u transferuan në një tren tjetër për të vazhduar udhëtimin.
Probleme janë regjistruar edhe në aeroportin e Gjenovës, ku disa fluturime pësuan vonesa për shkak të kushteve atmosferike. Një fluturim i nisur nga Bukureshti u devijua drejt Pizës gjatë orëve të para të ditës.
Reshje veçanërisht intensive janë regjistruar në Chiavari, në provincën e Gjenovës, ku ranë 103 milimetra shi brenda vetëm një ore. Në zonat malore reshjet kaluan 60 milimetra.
Sasia e madhe e ujit shkaktoi përmbytje dhe detyroi autoritetet të mbyllnin disa nënkalime. Mbrojtja Civile po monitoron situatën, ndërsa deri tani nuk raportohet për situata emergjente.
Meteorologët paralajmërojnë se moti i keq mund të vijojë. Pas një dobësimi të mundshëm të reshjeve gjatë së enjtes, të premten parashikohet një përkeqësim i ri, me reshje më intensive dhe stuhi të forta përgjatë bregdetit.
Kushtet e paqëndrueshme atmosferike pritet të prekin edhe Toskanën qendrore dhe veriore. Qendra Operative Rajonale e Mbrojtjes Civile ka shpallur alarm portokalli për stuhi të forta nga ora 22:00 e së enjtes, 20 gusht, deri në orën 18:00 të së premtes, 21 gusht.
Në pjesën tjetër të rajonit është parashikuar alarm i verdhë gjatë së premtes. Presidenti i Toskanës, Eugenio Giani, bëri të ditura masat përmes rrjeteve sociale, duke njoftuar gjithashtu alarm të verdhë për rrezikun e përmbytjeve përgjatë sistemit kryesor të lumenjve në Toskanën qendrore.
Moti ekstrem ka shkaktuar pasoja më të rënda në Gjermani, ku stuhi të fuqishme dhe dy tornado kanë goditur disa lande.
Në Walldorf, në Rheinland-Pfalz, një grua 58-vjeçare humbi jetën dhe një tjetër, 47 vjeç, u plagos rëndë pasi një pemë e shkulur nga era ra mbi strehën ku ato ishin futur për t’u mbrojtur nga stuhia. Gruaja 58-vjeçare ndërroi jetë në vendngjarje, ndërsa 47-vjeçarja u transportua në spital.
Stuhitë rrëzuan pemë dhe shkaktuan dëme në ndërtesa edhe në zona të tjera të Rheinland-Pfalz.
Një tornado goditi zonën e Fürstenwalde-Spree, në Brandenburg, pranë Berlinit. Fenomeni u konfirmua nga Shërbimi Meteorologjik Gjerman (DWD). Autoritetet raportuan dëme materiale, përfshirë automjete të goditura nga pemët e rrëzuara, por nuk u raportuan të lënduar.
Një tjetër tornado goditi zonën pranë Wetzlarit, në landin e Hessenit. Sipas zjarrfikësve, rreth 60 shtëpi u dëmtuan.
Në Laubach, një pemë e rrëzuar dëmtoi një rezervuar gazi pranë një ndërtese banimi. Për shkak të rrjedhjes së gazit, autoritetet evakuuan zonën brenda një rrezeje prej 200 metrash.
Dëme të konsiderueshme janë raportuar gjithashtu në Turingi dhe Bavari, ku disa banesa janë bërë të pabanueshme.
Shërbimi Meteorologjik Gjerman ka paralajmëruar se stuhitë mund të vazhdojnë, veçanërisht në landët jugore të Baden-Württembergut dhe Bavarisë.