Një ngjarje e rëndë ka tronditur komunitetin shqiptar në Itali, ku 21-vjeçari Samir Fermaca humbi jetën në një aksident rrugor. Fillimisht u mendua se gjithçka ishte e qartë, por një dëshmi e re ka hapur dyshime mbi mënyrën si ndodhi tragjedia.
Ngjarja ndodhi mëngjesin e 13 qershorit, kur i riu po udhëtonte si pasagjer në një motor të drejtuar nga kushëriri i tij 26-vjeçar. Sipas versionit të parë, motori u përplas pas një konflikti me një SUV Audi. Në momentin kur mjeti dhe motori ishin paralel, Samiri goditi me këmbë pasqyrën e makinës, gjë që bëri motorin të humbiste ekuilibrin. Ai ra në asfalt dhe mbeti pa ndjenja, ndërsa kushëriri shpëtoi pa lëndime.
Një dëshmitar tjetër thotë se një makinë e dytë kaloi shumë pranë të riut ndërsa ai ishte i shtrirë në rrugë. Kjo ka ngritur dyshime se automjeti tjetër mund të ketë ndikuar në vdekjen e tij, edhe nëse e ka prekur lehtë. Për këtë arsye, prokuroria ka urdhëruar kryerjen e autopsisë, e cila do të bëhet në mënyrën më pak invazive, për të lejuar edhe dhurimin e organeve.
Hetimet vazhdojnë për të zbuluar nëse në aksident ka qenë i përfshirë një automjet i dytë dhe për të sqaruar plotësisht dinamikën e ngjarjes.